राष्ट्रिय स्वतन्त्र पार्टी

राष्ट्रिय स्वतन्त्र पार्टी नेपालको प्रमुख गैरकम्युनिस्ट दलमध्येको एक हो । ७ असार, २०७९ मा राष्ट्रिय स्वतन्त्र पार्टीको विधिवत स्थापना भएको हो । रास्वपाले आफूलाई ‘कुनै पनि परम्परागत सैद्धान्तिक वाद वा विचारबाट स्वतन्त्र रहेर विधिको शासन लागू गर्न’ क्रियाशील दलको रुपमा परिभाषित गर्न रुचाउँछ । संविधान जारी भएपछि मुलुकमा क्रियाशील दलका नेताहरूको अलोकप्रियतापछि आम जनमानसमा असन्तुष्टि बढ्दै थियो । असन्तुष्टिको लहरमा २०७९ सालको स्थानीय निर्वाचनमा केही स्वतन्त्र उम्मेदवारहरू निर्वाचित भए । त्यसपछि लामो समय टेलिभिजनकर्मीको रुपमा प्रसिद्धी कमाएका रवि लामिछानेको पहलमा रास्वपाको स्थापना भएको हो । रास्वपा स्थापनाकालमा केही सहकर्मीहरुलाई साथमा लिएर उनले पार्टी स्थापना गरेका थिए । पछि राष्ट्रिय स्वतन्त्र पार्टीमा विभिन्न नेता एवं समूहहरु मिसिए । नेपाली कांग्रेसबाट डा. स्वर्णिम वाग्ले रास्वपा प्रवेश गरे । गत महिनामात्रै विवेकशील साझा पार्टी रास्वपामा समाहित भएको छ भने काठमाडौं महानगरपालिकाका मेयर बालेन शाह रास्वपाका वरिष्ठ नेतामा चयन भएका छन् । रास्वपाले आफूलाई ‘आममानिसहरूको जीवनस्तरमा सकारात्मक परिवर्तन गर्न आवश्यक देखेमा कुनै पनि वाद, विचार, सिद्धान्तलाई साधनका रूपमा प्रयोग गर्न र त्याग्न स्वतन्त्र छ’ भन्ने कोणबाट जनतामाझ चिनाएको छ । वद एवं राजनीतिक दृष्टिकोणका सन्दर्भमा कतिपयले रास्वपाको यो धारको आलोचना पनि गर्छन् । रास्वपामा आवद्ध केही नेताहरु भने अहिले त्यहाँ छैनन् । महामन्त्रीको जिम्मेवारीमा रहेका डा. मुकुल ढकाल, निवर्तमान सांसद सन्तोष परियार र सुमना श्रेष्ठ अहिले रास्वपामा छैनन् । स्थापनाको शुरुवातताका संघीय नेपालको प्रादेशिक संरचनाको आलोचना गर्दै आएको रास्वपाले प्रदेशसभा निर्वाचनमा भाग लिएन । पछिल्लो समय भने उसले प्रदेशको मामिलामा पनि आफ्नो दृष्टिकोण उदार बनाउदै गएको छ । २०७९ सालमा रास्वपाले प्रत्यक्षमा ८ निर्वाचन क्षेत्र र समानुपातिकमा १३ सिट जित्यो । उसले समानुपातिकमा करिब ११ लाख मत पाएको थियो । पछि तनहुँ–१ मा भएको उपनिर्वाचनमा उसले एक सिट थप्यो । प्रतिनिधिसभा चौथो ठूलो दल बनेको रास्वपा आफ्ना सभापतिको नेतृत्वमा दुई पटक सरकारमा गएको थियो । अरु पुराना दलहरुको जस्तो देशव्यापी संगठन र पूर्णकालीन कार्यकर्ताको संरचना नभएपनि युवा र सामाजिक सञ्जालमा रास्वपाको पकड बलियो मानिन्छ । यो प्रतिनिधिसभा निर्वाचनमा रास्वपा आफूलाई प्रमुख शक्तिको रुपमा स्थापित गर्न प्रयासरत छ ।