सुमन सायमी (Suman Sayami)

कालीमाटी निवासी सुमन सायमी चर्चित सामाजिक अभियन्ता भर्खरै नेपाली कम्युनिस्ट पार्टी प्रवेश गरेका हुन् । २०४६ सालको आन्दोलनको राजनीतिक परिवर्तनमा उनको परिवारको ठुलो भूमिका थियो । भूमिगत कालमा सायमीकै घरमा कम्युनिस्ट पार्टीको केन्द्रीय समितिको बैठक बसेको थियो । बुवा जीवन मानन्धरको पदचाप पछ्याउँदै राजनीतिमा लागेका सायमी गुठी आन्दोलनका अगुवा हुन् ।  सडक विस्तारको विरोध, खोला मापदण्ड पीडित, लघुवित्त, भूमि पीडितहरूको पक्षमा उनी आन्दोलनमा सक्रिय रहे । 

२०७९ को स्थानीय तह निर्वाचनमा काठमाडौँ महानगरपालिकाको मेयर पदका लागि बालेन शाहसँग पराजित भएका थिए । त्यतिबेला उनले स्वतन्त्र उम्मेदवारका रूपमा १३ हजार ७७० मत प्राप्त गरेका थिए। २०७९ मै भएको प्रतिनिधिसभा निर्वाचनमा काठमाडौँ–८ बाट उम्मेदवार बनेका थिए । त्यतिबेला रास्वपाका उम्मेदवार विराजभक्त श्रेष्ठसँग पराजित भए । सायमी ६ हजार १७९ मत ल्याएर दोस्रो स्थानमा रहेका थिए । पछि राजेन्द्र महतो नेतृत्वको राष्ट्रिय मुक्तिमा लागेका उनी निर्वाचनको मुखमा नेकपा प्रवेश गरेर काठमाडौँ–८ बाट उम्मेदवार बनेका छन् । ५२ वर्षका उनले प्लस टुसम्म अध्ययन गरेका छन् ।