पुष्प बहादुर शाह (pushpa bahadur shahi)

२०१७ मंसिर २४ मा जन्मिएका नेपाली कांग्रेसका नेता पुष्पबहादुर शाह अछामको मंगलसेन नगरपालिका–५ का स्थायी बासिन्दा हुन् । २०३६ सालमा पार्टीको भ्रातृ संगठन नेपाल विद्यार्थी संघ (नेविसंघ) मा आवद्ध भएका उनले कानूनमा स्नातक गरेका छन् ।

२०३६ सालको जनमतसंग्रह, २०४६ को जनआन्दोलनमा सक्रिय सहभागी रहेका शाह २०४९ मा कांग्रेस अछामको जिल्ला सदस्य भए । पार्टीको जिल्ला सदस्य हुँदै कोषाध्यक्ष, सचिव र जिल्ला सभापतिको जिम्मेवारी सम्हालिसकेका शाह २०४९ सालमा साविक मंगलसेन गाविसको उम्मेदवार भए ।

तत्कालीन समयमा नेकपा एमालेको गढ मानिने मंगलसेनमा कांग्रेसबाट उम्मेदवार नपाउने अवस्था थियो । ९० प्रतिशत जनसंख्या एमाले रहेको गाविसमा कांग्रेसबाट कसैले चुनाव लड्ने हिम्मत नगरेपछि ३२ वर्षीय युवा शाहले उम्मेदवार बन्ने आँट देखाए ।

त्यही आँट उनका लागि राजनीतिको ‘टर्निङ प्वाइन्ट’ बन्यो । हाल कांग्रेस अछामका सभापति रहेका शाह २०६७ सालमा पहिलोपल्ट सभापति बने । पोखरा महाधिवेशनपछि लगातार कांग्रेसको महाधिवेशन प्रतिनिधि रहँदै आएका शाह नेपाल रेडक्रस सोसाइटी, नेपाल बार एशोसिएसन लगायत संघ–संस्थामा पनि आबद्ध हुँदै आएका छन् ।